Сустрэча з “Імпэтам”
27.09.2021Сустрэча з “Імпэтам”
Толькі мы адзначылі дзень Адзінства, як новае свята настае. Дзень Настаўніка, які традыцыйна адзначаецца ў Беларусі ў першую нядзелю кастрычніка. Гэта нагода паклікала ў госці ў нашу ўстанову адукацыі народны калектыў аўтарскай песні “Імпэт” Ільянскага СДК пад кіраўніцтвам Галіны Кутас, а таксама паэта, настаўніка, у нядаўнім бібліятэкара Міколу Кутаса.
Мікалай Сямёнавіч чытаў вершы, адказваў на пытанні школьнікаў, расказваў пра гады маленства, вучобу ў інтэрнаце, першую спробу радка. Таксама ён распавёў пра тое, як пішуцца вершы, чаму для гэтага неабходна адчуванне радка, адкуль бяруцца тэмы для гумарыстычных вершаў. Ён чытаў новыя вершы прама з невялікіх рукапісных аркушаў, сярод якіх і верш пра Вязынь:
…Цешыцца Вязынь
У промнях жыцця
Вечнага і трапяткога!
Вёска мая,
Ты Айчыны працяг,
Кропелька
Мора
Людскога…
“Імпэт” спяваў пра Радзіму, Нясвіж, дзе вучыўся будучы паэт, маладосць…
Творчая сустрэча падарыла многа станоўчых эмоцый і распачала тыдзень святкавання прафесійнага свята тых, хто сее разумнае, добрае, вечнае…