Волонтерский отряд " Тимуровец ". Новости....
01.07.2021Наперадзе – цікавыя навіны і апавяданні.
Напярэдадні Дня Незалежнасці Рэспублікі — галоўнага дзяржаўнага свята, валанцёрскі атрад “Цімуравец” прыбіраў помнік землякам, якія загінулі ў барацьбе з нямецка-фашысцкімі захопнікамі за свабоду і незалежнасць нашай краіны, у вёсцы Селішча Вязынскага сельскага савета. Атрад створаны з навучэнцаў дзяржаўнай установы адукацыі “Вязынскі навучальна-педагагічны комплекс дзіцячы сад-сярэдняя школа”, актыўных школьнікаў іншых навучальных устаноў, а таксама падлеткаў з сем’яў, што патрабуюць значнай педагагічнай увагі. Дзейнічае ён на базе Селішчанскага сельскага клуба ДУК “Цэнтралізаваная клубная сістэма Вілейкага раёна” і гэткім важным і патрэбным заняткам распачаў тузін добрых спраў. Дзве дзяржаўныя ўстановы і з’яўляюцца заснавальнікамі незвычайнага праекта .
Дзейнасць валанцёрскага атрада арганізавана ў лепшых традыцыях валанцёрскага руху і ў адпаведнасцю з прынцыпамі валанцёрскай дзейнасці: добраахвотнасцю, бескарыслівасцю, добрасумленнасцю і роўнасцю.
На першым арганізацыйным сходзе быў абраны камандзір атрада. Ім стала Даша Шымановіч, вучаніца 6 класа, якая сябе зарэкамендавала лідэрам падчас работы школьнага аздараўленчага лагера “Пілігрымы”, што працаваў у чэрвені пры Вязынскай школе. Ніводная ранішняя зарадка не праводзілася без інструктара Дашы. Гэтым яна атрымала права насіць аранжавую бейсболку камандзіра. У ролі лідэра на працягу работы валанцёрскага атрада можа паспрабаваць сябе кожны яго ўдзельнік.
Дарэчы, дарослыя ў гэтым атрадзе толькі кансультанты і каардынатары. На прывіццё самастойнасці, самакіраванне, набыццё лідарскіх якасцей накіравана стратэгія дзейнасці “Цімураўца”. Задачу ставяць кансультанты, а самі цімураўцы прапануюць шляхі, парадак і спосабы яе вырашэння. Гульня роляў гэта сродак сацыялізацыі і сталення дзяцей і падлеткаў.
У штабе атрада - памяшканні былой бібліятэкі- на вялікім папяровым аркушы ўліку добрых спраў абрысы дзіцячых далонькаў і першы запіс: “добраўпарадкаванне помніка землякам”. Наперадзе – цікавыя навіны і апавяданні з жыцця цімураўскага атрада. Чакайце і чытайце!